Friday, 16 March 2018

CHHIMTIANG VANGKHAWPUI



Zawlkhawpui daifem
Chhimtiang vangkhawpui chu.
Awihtlan pangper, an sel maw a sakruang?
Zawltin pheitin, lamtluangpui zawng aiin kan thlang.
Pheilai vawrin lengi leh valrual zawngte’n kan mawi thin
Kan vangkhaw chhuk phei cham diai.

Mihuai daidote’n
An mawi thin kan vangkhua,
Mihrang sahrang hmaah an zam ngai lo.
Zawlkhawpui chhan, mihuai daido rual tual an leng.
Mihuai sulhnu chhuiin keini thang leh thar rual zawngte’n
Kan chhingtiang vangkhua kan mawi.

Chhimtiang vangkhawpui
Pipu chena kan chhuan.
Zalengtin lungrual tual kan lena hmun
Elrel, itsik, chapo leh hmuhsit a awm lo.
Zaikhata luangin; Lianchhung, singkhua sangkhua kan ngai lo
Kan chhuang, kan chhimtiang vangkhua

An than thin an sakhming
Kan vangkhawpui chawiin.
A fanchhuak, a dung leh vang Zoram hi
An ruat khelthiam(tur)a’n chhimtiang khawpui valrual zawng.
Thangthar chenah pawh chhawm zel turin thoin harh i la
Chhimtiang vangkhawui valrual.

Zaiin chawi na’nge
Sakhming chullo tur a’n.
A sakhming lo zahawm se mi tawnah
Hmatin hruaitu. Lutin hotu hringchhuak ngei se
A dai tawh lo’ng a sawkhmingmawi, thang leh thar, chhuan thara’n
Chhimtiang vangkhawpui VENGHNUAI.

-ahooma
2011

Friday, 13 October 2017

VENGHNUAI UAL KAP THEME SONG


VENGHNUAI UAL KAP

Kum 1997 ah khan mi thahnemngai thenkhatin veng mipuite inlungrualna leh intihhlimna atan ngaihtuahna sengin Venghnuai mipuite football khelh runpui 'VENGHNUAI UAL KAP' hi an lo tichhuak a ni. Ex-CYMA OB Pu C. Remtluanga (tunah chuan Kohhran Upa a ni ta) chuan mithahnemngai thenkhat fam chang ta pu Vanlalsanga te, Pu Maenga (Engduma) leh Tv. U Chawitea te sawmkhawmin VENGHNUAI UAL KAP hi an lo buatsaih tan a ni.
Chu Ual Kap khel tur chuan vengchhunga puitling chin, football khel ngai vaklo ho chu team hrang hrangah an han then darh ta a,  hei hi thil awlsam tak chu a ni lo a, vengchhung mi zawng zawng a mal mala hriat chhuah vek an ngai a ni.

Tuesday, 1 March 2016

VENGHNUAI VC MEMBER HMASA BERTE

Venghnuaiin midang nen inkawp loa keimahni puala VC kan neih hmasak ber chu kum 1985-ah khan a ni a, hemi kuma VC member leh an nihnate lo tarlang ila :-

President: Pu Zamanthanga
Vice President: Pu Lalrosanga
Secretary: Pu H.Rohmingliana

Members:-
Pu Z.Thanáš­huama
Pu Laichana
Pu CT.NGura te an ni.
         
Mahni puala VC hran kan neih hma, midang nen kan inkawp lai pawh hian VC member engemawzat kan nei reng thin a, a bik takin pu HC.Sapthankhuma phei chu hun rei tak chhung VC Secretary a ni reng thin a ni.


Wednesday, 14 August 2013

Venghnuai Br YMA 'Kan Zotlang ram nuam'

YMA Zaipawl intihsiak(Rokunga hla phuah) ah Pu Rokunga pian leh seilenna veng kan nih angin pakhatna nih kan tum viau a; Mahse midang kan kian ta.Kan zaipawl member-te an zaithiam tho tho e (Y)

Saturday, 9 March 2013

Venghnuai chanchin


Aizawl chhim lam, chhuah chhawng ep zawnga khaw inpharh nuam tak leh zing ni chhuak dawng tha tak, a mi chengte pawh chhungkaw khawsak inrualkhai taka an khawsak hona VENGHNUAI hi Kulikawn leh Mission veng inkara awm niin, Aizawla veng hlun leh upa berte zing ami a ni.

TOBUL: Venghnuai chanchinah hian Thakthing veng hi a bulthut a nih avangin kan sawi lang lo thei lo a. Thakthing tih hming a put telna chhan ber nia lang chu a hmunah hian Thakthing a tam thin em vang niin a lang.

Hemi hmuna Rahsi ho an dahkhawm hma hian khua angin mihring an lo awm tawh a, Sawrkar-in Rahsi ho awmna’na a siam hma chuan Palala Hmar khua a ni. Khum 1905 a Sawrkar-in Rahsi ho awmna atana a  lo ruahman takah chuan a lo cheng hmasate chu a khaw mawngah awmtirin veng thar, ‘Rahsi Venghnuai’ tih hming puttir a ni. Tunah chuan ‘Venghnuai’ tih ringawt puin hun rei tak atang khan kan lo awm ta a ni.

Tichuan Venghnuaiin bul kan tanna chu thakthing venga  Rahsi an dah kum, 1905 chu a lo ni ta a nih chu. Thakthing veng pawh Rahsi ho awmna atana siam a nih angin Rahsi veng tih a ni a. Tunah chuan Thakthing veng tih niin Aizawla veng hlun berte zing ami a ni.

Venghnuai chu veng anga ruahman a lo nih chuan, a mi cheng hmasate chu khawchhiar te, Babu ho kuli te, tlangau te bakah lal upa te pawh awmin, he’ng bakah hian khawtual mi pawimawh engemawzah an awm bawk a ni. A nihna takah chuan Thakthing veng ami an sawnthlak tak ho kha an nih avangin Aizawlah pawh mi hmasa an ni ti ila kan sawisual kher lo ang.

RORELTUTE: Thakthing veng hmunah hian engtik kum atangin nge Lal rorelna neia an lo awm tawh kan hre thui lo a. Ziaktu thenkhat ziak atanga kan hmuh angin Palala khua a ni tih kan hmu a. Chuti a nih chuan Palala chu roreltu hmasa kan hriattheih lo ni se, a hnu ah chuan  a fapa Kapdaia’n ro a rel leh tih kan hmu bawk a ni.

Sawrkar-in Rahsi ho awmna tur  ruahmana vengthar siamsaka Venghnuai hmuna an lo awm hnu chuan Rahsi veng leh Rahsi venghnuaiah chuan Pu Suaka Chawngthu chu khaw roreltu angin a thu a, ani hnuah hian Paliana Hauhnar, Lushai Clerk chuan rorelna chu rochung ve lehin, ani hi kum 1912 atanga 1931 thleng Sawrkar-in Mizo lal angin rorelna a neihtir a ni.

Paliana hnuah hian Lushai clerk dang dang- Pu Suaka Kawlni, Pu Neihhrima leh Pu Chawnglera te chu Lushai Clerk an nihna angin Sawrkar-in khaw hotu roreltu atan a dah ve leh a; Mahse anni erawh hi chu Paliana thuneihna chen ang khan Mizo Lal angin an awm loh bakah an rorelna huam chin pawh a zim a ni.

Paliana Hauhnar, Lushai Clerk kha Sawrkar-in Aizawl pumah Mizo Lal dangte lalna ang bawkin roreltu atan a ruat a, Rahsi veng leh Venghnuai pawh a lalna huam chhung a nihna angin a bikin kan tarlang mai a ni. Amaherawhchu ani pawh hian Aizawl pum hi Lal angin a thut reng bik lova, a hnu lamah veng dang engemaw zah chu Lushai Clerk dangin Lal angin an awp ve a ni.

Mizo lalte lalna a lo tawp hnu, hun engemaw lai atang khan khawtin ah leh veng hrang hrangah kan aiawha roreltu tur thlangin village council inawpna danin kan lo awm chho ta a ni.

-PC LALNGAIHAWMA

Thursday, 10 January 2013

Venghnuai Presbyterian kohhranin kum 60 a tling ta


Venghnuai Presbyterian Kohhran hi Kum 1953 ah khan Mission Veng kohhran atangin a indang a, tunah hian kohhran member 1313 an awm mek a ni. Venghnuai Kohhran atang hian Damveng leh Salem kohhrante an indang tawh bawk a ni. Dt 07.01.2013 khan he jubilee hi hman tan ni in Bialtu Pastor Rev.Lalneihvura chuan Jubilee meichher a det a ni. 

He Jubilee lawmna kal zel ah hian Durtlang Presbyterian Hospital tan thisen Unit 63 pek a ni a. Vengchhung doctor rual te tlawmngai tur a sawmin Free clinic neih a ni a, mi 100 chuang an inentir a ni. Tin, Jubilee pual hian thawhlehni zingkar ah Kawngzawh a ni a, mi thahnem tak an kal a ni. Dt.08.01.2013 khan World Bank road-ah Jubilee pualin bethel pui neih a ni. He jubilee lawmna ah hian zaipawl pawh a tam thei ang ber an zai a ni.

Jubilee pual hian Biak In thar sak a ni a. He Biak In hi jubilee lawmna pui ber ni- dt.11.01.13 ah khian Upa L.Z.Zomawia, Moderator Aizawl east Presbytery chuan a hawng dawn a, tlai ah ruai kil ho a ni ang.

He Kohhran a lo lawi tawh leh Venghnuai a lo awm tawh te leh Vengchhung mi a thei apiang leh he hun ngaihhlutpui tute zawng zawng Jubilee ruai kil turin min sawm e.

-CHDA VH