VENGHNUAI UAL KAP

Kum 1997 ah khan mi thahnemngai thenkhatin veng mipuite inlungrualna leh intihhlimna atan ngaihtuahna sengin Venghnuai mipuite football khelh runpui 'VENGHNUAI UAL KAP' hi an lo tichhuak a ni. Ex-CYMA OB Pu C. Remtluanga (tunah chuan Kohhran Upa a ni ta) chuan mithahnemngai thenkhat fam chang ta pu Vanlalsanga te, Pu Maenga (Engduma) leh Tv. U Chawitea te sawmkhawmin VENGHNUAI UAL KAP hi an lo buatsaih tan a ni.

Chu Ual Kap khel tur chuan vengchhunga puitling chin, football khel ngai vaklo ho chu team hrang hrangah an han then darh ta a,  hei hi thil awlsam tak chu a ni lo a, vengchhung mi zawng zawng a mal mala hriat chhuah vek an ngai a ni.

UAL KAP 2017 ah pawh hian a buaipuitu 30 dawn kan awm chungin hmaih palh kan ngah khawp mai.

 Tichuan vengchhung inlungrualna atan, kan lo inpawhtlan zawk na'n, mi inang lo, sa inang lo tak takte chu team hrang hrangah inthendarhin football kan pet ta suau suau mai le! A hlawhtling nangiang mai..

Ual Kap ah chuan team tinin chaw eikhawm ngei ngei tur a ni tawp a, Kohhran a rawngbawltu lawk ber leh zu zuar te, pa hausa ber leh rethei ber, a lian ber leh te ber thlengin hlui khatah zanriah an han kilho meuh chuan vengchhung boruak chu a tidanglam hneh kher mai.. Ual kap nge nge chu tiin kum tin tithei lo mah ila, a khat mawi tawkin neih chho reng a ni a, 2017 ah phei chuan a 'VENGHNUAI UAL KAP' hian kum 20 na ropui takin a  lo lawm thei ta reng mai.

Ual Kap ah hian Ballboot bun phal a ni lo a, ball pet thiam lutuk phal a ni hek lo. Player inthlak dawnin Referee in thuneihna a nei lo a, Red Card hmuhin line thlenga vawi khat tlan pheiin a luh chhunzawm theih, chhuah hnuah pawh a luh leh theih tho. Inkhelh tan hmain Security deposit Rs 200 dah luh niin YC ah Rs 10, RC ah Rs 20 chawi tur a ni a, Deposit hi chu hman zawh ngei ngei tur a ni tawp.. A ruala YC leh RC hmu pawh an awm nual.

Free Kick pet goal chu Card hmuhna khawp sual a nih laiin penalty pet goal loh pawh Card hmuhna a ni tho a, inkhelh laia fai bik lutuk emaw, inkhel ngaihtuah lo pawhin lei a chawi theih a, referee an lo hliah palh hlauh pawhin card an chawi tho.. Lukhum khum an hrem laiin kekawrtlawn nena inkhel pawh an bang chuang hek lo.

Ual Kap a nih miau avangin a dan a dang a, inkhel tan dawnah Field chara bawkkhup a Arm Wrestling, Kezungpui insual (pir), Arpa insual te chu kan Coin toss ve dan a ni a, a aia danglam pawh kan ngaihtuah belh zel bawk.

Klap hming leh player te pawh an inmil threh thrawh viau.. Phuailuai club manager in a phone tihbo, ka kawlsak te chu ni 3 hnuah an rawn la chauh a, Chawrche manager pawhin a ban awrh a, Chawntawi Player te lah hnim karah an pil lek lek fo.. 

Suihlungmawl ho lah chawlh laia khelh dan tur an inhrilhin awmzia a nei heklo. .Mahse Ual Kap a ni miau a, hlimlo leh lawmlo kan awm derlo... Inkhelh a a chak zawk an hlim tluk zetin a chaklo zawk pawh an lawm em em zel tho nia mawle! 'VENGHNUAI UAL KAP' Venghnuai mipuite'n kan hlimpui takzet e.  -ZAIA HNAMTE

Venghnuai Ual Kap hla

Veng lungrual leh nuam takah

Nuam takah nuam takah

Hlim leh lawmin kan leng e

Venghnuai kan ni

Veng dang reng reng kan ngai lo.

Kan ngai lo, kan ngai lo.

Hlim takin kan khel leh dawn

Venghnuai Ual Kap

Club hrang hrang kan rawn ding chhuak

Rawn ding chhuak, rawn ding chhuak

Bon takin kan khel leh dawn

Venghnuai Ual Kap

Kan veng hi lo vul reng se.

Vul reng se, vul reng se.

Kan lungrualna zawng zawng hi

Chhawm nung zel ang.

Khuavel zawng zawng thangchhuak se

Thangchhuak se, thangchhuak se

Kan veng hming lo thang rawh se

Venghnuai kan ni.- Ahooma